Nesër pritet të rrënohet muri në Mitrovicë

Në koordinim me Ambasadën e Shteteve të Bashkuara të Amerikës dhe BE-në institucionet kosovare kanë marrë vendimin për rrënim

Pasi kanë kaluar rreth dy muaj nga ngritja e murit “misterioz” në veriun e Mitrovicës, duket se më në fund ai do të rrënohet. Murin e ndërtuar ilegalisht, institucionet kosovare që në fillim ishin zotuar se do ta rrënonin. Më në fund , në koordinim me Ambasadën e Shteteve të Bashkuara të Amerikës dhe BE-në institucionet në fjalë kanë marrë vendimin për rrënim.

Portali Indeksonline ka siguruar dokumentin në të cilin është pararparë heqja e këtij muri ilegal. Firmosjen për largimin e tij e kanë bërë edhe serbët e veriut, respektivisht kryetari Goran Rakiq dhe Branimir Stojanoviq. Ndër të tjera, aty thuhet se palët kanë rënë dakord për heqjen e strukturës ekzistuese dhe zbatimin e një projekti të ardhshëm.

“Me 4 ose 5 shkurt duhet të rrënohet objekti. Të dielën do të bëhet largimi i strukturës ekzistuese”, thuhet në vendimin e nënshkruar në orën dy pasmesnate.

Derisa është paralajmëruar se ndërtimi i projektit të ri do të nisë më 7 shkurt. “Drejtoria e urbanizmit në veri do ta lëshojë lejen e ndërtimit në përputhje me pikën III të këtij vendimi”.