Vendimi për Ramush Haradinajn shtyhet më 2 mars

Gjykatë në Colmar të Francës ka shtyrë për 2 mars, vendimin për ish-kryeministrin e Kosovës, Ramush Haradinaja. Ai është pyetur nëse pranon të ekstradohet në Serbi, por Haradinajt u përgjigj kundër, duke e cilësuar këtë gjykim “politik”

Gjykatë franceze në Colmar të Francës ka shtyrë për 2 mars, vendimin për lirimin ose ekstradimin në Serbi të ish-kryeministrit të Kosovës, Ramush Haradinaj. Ky vendim është marrë në seancën e të enjtes, kur Haradinaj, kryetar i Aleancës për Ardhmërinë e Kosovës është pyetur nëse pranon të ekstradohet në Serbi në bazë të kërkesës që ka parashtruar Beogradi.

Mirëpo, përgjigja e Haradinajt ishte kundër, duke ia rikujtuar gjykatësit se “ky rast është krejtësisht politik”.

Ish-kryeministri i Kosovës dhe ish komandanti më në zë i UÇK-së, u ndalua nga autoritetet franceze më 4 janar në bazë të një urdhër-arresti të lëshuar nga Serbia përmes INTERPOL-it.

Avokati mbrojtës i zotit Haradinajt, Arianit Koci, i tha REL-it se kërkesa për ekstradim është e pabazuar dhe do të refuzohet si e tillë.

“Nuk ka dilemë që kërkesa e Serbisë është kërkesë politike. Këtu nuk kemi rast penal, prandaj unë besoj që kjo kërkesë e tyre do të refuzohet dhe zoti Haradinaj do të lirohet. Nuk është e rastit që Serbia ka një inat ndaj zotit Haradaniaj, Serbia nuk mund t’ia fal kurrë atij angazhimin për pavarësinë e Kosovës dhe luftimin e politikës gjenocidale të pushtetit të Millosheviqit”, ka thënë avokati Koci.