Komuna e Prishtinës me shumë aktivitete për Pavarësi

Për nder të kësaj feste do të festohet me shumë këngë, valle, poezi, shfaqje, promovim të librit, ekspozitë e kështu me radhë

Nëntë vjetori i Pavarësisë së Kosovës do të festohet edhe në mënyra të ndryshme nga Komuna e Prishtinës, raporton albinfo.ch.

Në kryeqytetet do të ketë shumë aktivitete për nder të kësaj feste. Aktivitetet fillojnë në objektin e Galerisë së Fakultetit të Arteve, do të hapet ekspozita me punime të nxënësve të gjitha shkollave të Komunës së Prishtinës.

Në këtë ekspozitë, secili institucion edukativo-arsimor do të përfaqësohet me nga tre-katër punime të punuar nga nxënësit e shkollave të tyre.

Në Teatrin Dodona nga ora 12:00 do të nisin interpretimet e koreve të ndryshme të Kosovës. Mbrëmja e 16 shkurtit në Dodonë, është rezervuar për shfaqjen  “Lusi në qiell” me fillim nga ora 19:30.

Ndërsa 17 shkurti, në po këto dy institucione të Komunës së Prishtinës që janë Teatri Dodona dhe Biblioteka “Hivzi Sylejmani”, do të festohet me shumë këngë, valle, poezi, shfaqje, promovim të librit, ekspozitë e kështu me radhë.