Kosova mendon sërish anëtarësimin në UNESCO

Aplikimi duhet të jetë gati në qershor, nëse do të bëhet këtë vit. Murtezaj tha se legjislacioni duhet të miratohet nga dy të tretat e deputetëve, por gjithashtu edhe nga dy të tretat e deputetëve të pakicës etnike

Pasi nuk mundi të anëtarësohet në fund të vitit 2015, Qeveria e Kosovës është duke u përgatitur për një kërkesë të re drejt pranimit në UNESCO, shkruan ‘balkaninsight.com’.

Valon Murtezaj, zv/ministri i punëve të jashtme të Kosovës, ka thënë se Prishtina po merr parasysh të ripërtërijë kërkesën për t’iu bashkuar Organizatës së OKB-së për Arsimin, Shkencën dhe Kulturën, përcjell albinfo.ch.

“Kemi një ekip që po punon me këtë çështje. Është një ekip i brendshëm që ka punuar për një kohë të gjatë. Tani ne dimë shumë gjëra që nuk i dinim më parë. Tani kemi gjithashtu një strategji për trashëgiminë kulturore të miratuar nga qeveria”, deklaroi Murtezaj.

Aplikimi duhet të jetë gati në qershor, nëse do të bëhet këtë vit. Murtezaj tha se legjislacioni duhet të miratohet nga dy të tretat e deputetëve, por gjithashtu edhe nga dy të tretat e deputetëve të pakicës etnike, që do të thotë se s’mund të miratohet deri kur deputetët serb nga blloku Lista Srpska t’i japin fund bojkotimit aktual të parlamentit.

Trazira e vitit 2004 u përdor nga qeveria serbe si pjesë e përpjekjes së saj lobuese kundër kërkesës së Kosovës për anëtarësim në UNESCO.