Subjektet shqiptare myslimane të Zvicrës u zotuan për Laicitet

Marrëveshja në mes të imamëve Mustafa Memetit, kryetar i Bashkësisë Islame Shqiptare të Zvicrës, dhe Nehat Ismailit, kryetar i Unionit të Imamëve Shqiptarë të Zvicrës është nënshkruar në praninë e përfaqësuesve të autoriteteve federale të Zvicrës dhe të tre ambasadorëve të vendeve prej nga vijnë shqiptarët

Sot në Bernë, në shtëpinë e Religjioneve, dy subjektet shqiptare që përfaqësojnë besimtarët myslimanë të Zvicrës kanë nënshkruar marrëveshjen lidhur me laicitetin në të cilën ato zotohen për respektim të shtetit ligjor dhe për distancim nga tendencat për përdorimin e besimit fetar për qëllime politike.

Marrëveshja në mes të imamëve Mustafa Memetit, kryetar i Bashkësisë Islame Shqiptare të Zvicrës, dhe Nehat Ismailit, kryetar i Unionit të Imamëve Shqiptarë të Zvicrës është nënshkruar në praninë e përfaqësuesve të autoriteteve federale të Zvicrës dhe të tre ambasadorëve të vendeve prej nga vijnë shqiptarët: Nazane Breca, Ilir Gjoni dhe Rafet Hajdari.

Nismën dhe ndërmjetësimin për këtë marrëveshje e ka marrë ish ambasadori i Kosovës në Zvicër, Naim Malaj.

Sipas folësve që morën fjalë në këtë veprimtari, subjektet shqiptare kanë ndërmarrë një hap të rëndësishëm dhe kuptimplotë të vullnetit të mirë për të dhënë kontributin e tyre në kultivimin e mirëkuptimit dhe bashkëjetesës në mes të komuniteteve të ndryshme fetare e etnike në Zvicër.

Albinfo.ch ka qenë e pranishme në aktin e nënshkrimit dhe më vonë do të sjellë një përmbledhje më të zgjeruar të këtij aktiviteti, përfshirë edhe deklarimet e atyre që bënë të mundur këtë marrëveshje.