Ilir Meta zgjidhet president i ri i Shqipërisë

Në mbledhjen e sotme të Parlamentit të Shqipërisë, Meta është zgjedhur president me 87 vota pro dhe 2 kundër, edhe pse për zgjedhjen e tij mjaftonte shumica e thjeshtë prej 71 votash.

Ilustrim

Pas katër raundesh të votimit, kryetari i Lëvizjes Socialiste për Integrim, Ilir Meta është zgjedhur presidenti i ri i Republikës së Shqipërisë. Në mbledhjen e sotme të Parlamentit të Shqipërisë, Meta është zgjedhur president me 87 vota pro dhe 2 kundër, edhe pse për zgjedhjen e tij mjaftonte shumica e thjeshtë prej 71 votash.

Meta bëhet kështu presidenti i tetë (8) i Republikës së Shqipërisë. Për kandidaturën e tij kishin hedhur firmat 23 deputetë, 17 nga LSI dhe 6 të tjerët nga PDIU.

Mbrëmjen e djeshme, Kryesia e Partisë Socialiste mbështeti unanimisht figurën e kreut të Kuvendit për të kandiduar për postin e kreut të shtetit. Kundër Metës kanë qenë deputetët e Partisë Demokratike, të cilët nuk kanë marrë pjesë në këtë proces.

Ilir Meta ka lindur më 24 mars të vitit 1969 në Çorovodë të Shqipërisë. Ai ka qenë kryeministri i Shqipërisë nga vitit 199-2002 dhe ish ministër i jashtëm, ndërsa periudhën e fundit ka qenë Kryetar i Kuvendit të Shqipërisë dhe njëherësh kryetari i Lëvizjes Socialiste për Integrim.

Meta është që prej 15 viteve deputet i Kuvendit të Shqipërisë, dhe një nga figurat kryesore politike shqiptare. Meta u diplomua për Ekonomi Politike në Fakultetin Ekonomik të Universitetit të Tiranës dhe ka përfunduar Studimet Pasuniversitare në të njëjtën fushë.

Ilir Meta është i martuar me Monika Kryemadhin dhe kanë tre fëmijë, Borën, Besarin dhe Erën. Ai flet rrjedhshëm gjuhen angleze dhe atë italiane.