Talat Xhaferi merr mbështetjen e Zvicrës

Kryetari i Kuvendit të Maqedonisë, Talat Xhaferi, ka takuar të mërkurën ambasadoren e Zvicrës në Maqedoni, Sibil Suter Tejada.

Ambasadorja e Zvicrës, Tejada, shfaqi shpresën se pas krizës politike, së shpejti, në mënyrë demokratike, do të konstituohen institucionet shtetërore, si fazë në vijim për stabilizimin e vendit, thuhet një njoftim për media, shkruan albinfo.ch.

Ambasadorja zvicerane nënvizoi gatishmërinë e mëtutjeshme të Zvicrës që aktivisht të vazhdojë me projektet në Republikën e Maqedonisë, posaçërisht me Kuvendin e Republikës së Maqedonisë, ku në Institutin parlamentar ka rol të drejtpërdrejtë financiar dhe profesional në aktivitetet e tij. Gjithashtu, informoi për projektin e ri, i cili ka për qëllim ta përfshijë tërë Kuvendin, për çka plotësisht do të përpunohen fazat, bartësit dhe aktivitetet e përgjithshme për realizimin e tij.

Kryetari i Kuvendit të Maqedonisë ka shprehur falënderimin për ndihmën dhe mbështetjen e madhe nga Qeveria dhe Parlamenti i Zvicrës në ndërtimin dhe avancimin e kapaciteteve demokratike të Republikës së Maqedonisë dhe posaçërisht Kuvendit.

“Dy bashkëbiseduesit këmbyen pikëpamje dhe pritje edhe për ngjarjet e 27 prillit në shtëpinë më të lartë të qytetarëve, për gjendjen aktuale politike në Republikën e Maqedonisë, për hapat e ardhshëm lidhur me formimin e qeverisë së re si reflektim i shumicës parlamentare, më pas për situatën aktuale juridike lidhur me shpalljen e zgjedhjeve lokale (dhe në kontekst të projekteve tashmë të filluara të komunave me Qeverinë zvicerane), si dhe për rolin e kryetarit dhe të tërë Kuvendit në këtë procedurë në pajtim me Kushtetutën dhe dispozitat ligjore”, thuhet më tutje në njoftim, përcjell albinfo.ch.

Duke besuar në bashkëpunimin e mëtutjeshëm, posaçërisht për shkak të lidhjeve të ngushta që kanë dy shtetet me dekada për shkak të diasporës nga Maqedonia, e cila jeton, punon dhe realisht kontribuon në jetën ekonomike dhe sociale në Zvicër, Xheferi dhe Tejada u shprehën që bashkëpunimi miqësor ndërmjet dy shteteve do të vazhdojë edhe në të ardhmen.