Zoran Zaev brenda kësaj jave e formon qeverinë

LSDM dhe partnerët e shumicës së re parlamentare brenda kësaj jave pritet të finalizojnë marrëveshjen për formimin e qeverisë së re, që nënkupton edhe ndarjen e resorëve ministrore

Lidhja Socialdemokratike e Maqedonisë (LSDM) dhe partnerët e shumicës së re parlamentare brenda kësaj jave pritet të finalizojnë marrëveshjen për formimin e qeverisë së re. Mandatari për formimin e qeverisë, Zoran Zaev tashmë po i zhvillon bisedimet intensive për ndarjen e dikastereve me partitë shqiptare, BDI-në, Besën dhe Aleancën për Shqiptarët.

Nga takimet e deritanishme të BDI-së dhe Lëvizjes Besa me LSDM-në nuk janë dhënë informacione se cilat resorë të ekzekutivit i kanë për synim.

Nga të dyja partitë mund të kuptohet se bisedimet në raundin e parë kanë qenë të fokusuara parasëgjithash në prioritetet e qeverisë së re reformatore, ndërsa nuk është diskutuar për emrat dhe ndarjen e resorëve ministrore.

Aleanca për Shqiptarët,  bisedimet me LSDM-në,  i fillo sot me ç’rast pritet edhe fjalim i liderit të LR-PDSH-së, Zijadin Sela për formimin e qeverisë së re. Kreu i LR-PDSH-së konferencën për mediet do t’i mbajë për herë të parë pas rrahjes brutale në 27 prill në Kuvend, ku nga gjithë deputetët e shumicës parlamentare pikërisht personin që pësoi më shumë lëndime ishte Zijadin Sela.

Një ditë më parë  funksionari i lartë i Aleancës për Shqiptarët, Arben Taravari tha se të gjitha partitë shqiptare do të duhej ta mbështesnin qeverinë e re deri në stabilizimin e vendit nga kriza e deritanishme, edhe nëse nuk përfshihen në ekzekutiv. Por, Taravari për mediet lokale thotë se gjithësi do të insistohet në implementimin e deklaratës së partive shqiptare.