Pos nga rriqrat, Kosova rrezikohet edhe nga ethet e minjve

Dy persona janë në gjendje mjaft të rëndë shëndetësore nga ethet e minjve, kurse gjatë këtij viti 67 persona kanë kërkuar ndihmë mjekësore si pasojë e pickimit të rriqrave

Në Klinikën Infektive në Qendrën Klinike Universitare të Kosovës, dy persona janë në gjendje mjaft të rëndë shëndetësore nga ethet e minjve, raporton ‘Evropa e Lirë’.

Mësohet se gjatë këtij viti në Kosovë 67 persona kanë kërkuar ndihmë mjekësore si pasojë e pickimit të rriqrave, përcjell albinfo.ch.

Gjithashtu edhe një person është hospitalizuar nga kafshimi i gjarpërinjve, që mund të jetë sëmundje shumë serioze, madje vitin e kaluar 21 persona kishin kërkuar ndihmë nga kafshimi i gjarpërinjve.

Në Ministrinë e Shëndetësisë janë shprehur se tashmë ekziston Këshilli Nacional për ethet hemorragjike dhe ethet e minjve, ku ka dhe një plan me të cilin parashihet se çka do të punohet për çdo vit, në mënyrë që të parandalohen këto sëmundje.

Nga ethet hemorragjike, vetëm gjatë vitit 2013, kanë vdekur 11 persona, ndërkohë që shifrat tregojnë se të pickuar nga rriqrat, ishin 5,200 persona.