Shqiptarët, shtatë ministri në “Qeverinë Zaev”

Në qeverinë e re të Maqedonisë, që konsiderohet reformatore, shqiptarët do të përfaqësohen me shtatë resore ministrore dhe me dy zëvendëskryeministra

Lideri socialdemokrat i Maqedonisë, Zoran Zaev, të martën pritet ta paraqesë para Kuvendit të Maqedonisë kabinetin e tij qeverisës, me dy zëvendëskryeministra dhe 23 ministra. Prej tyre në qeverinë e re, që konsiderohet reformatore, shqiptarët do të përfaqësohen me shtatë resore ministrore dhe me dy zëvendëskryeministra.

Kryeparlamentari Talat Xhaferi, pasi është informuar për përbërjen e ekzekutivit dhe programin qeveritar ka caktuar për të martën në orën 11:00 seancën e diskutimit në Kuvend.

Bashkimi Demokratik për Integrim përfaqësohet me gjashtë emra në qeverinë e re, nga të cilët dy janë zëvendëskryeministra dhe një ministër pa portofol, ndërsa Aleanca për Shqiptarët me dy ministra.

Pjesa tjetër e qeverisë i takon LSDM-së, emrat e së cilës nuk kanë shumë surpriza, ndërsa Lëvizja Besa do të qëndrojë në opozite, pasi nuk arriti marrëveshje për bashkëqeverisje.

Kreu i LSDM-se është shprehur se vendi meriton të ketë sa më shpejt qeverinë e tij, e cila do të nisë punë menjëherë, pas shumë muaj janë humbur dhe procesi i reformave ka ngecur. Sa i përket programit, Zaev theksoi se qeveria e tij do të punojë për shanse të barabarta për të gjithë qytetarët e Maqedonisë dhe për sa më shumë zhvillim e prosperitet për familjet e tyre.

Qeveria e re e Maqedonisë

Kryeministër: Zoran Zaev (LSDM)
Zëvendëskryeministër për marrëdhënie ndëretnike: Hazbi Lika (BDI)
Zëvendëskryeministër për euro-integrime: Bujar Osmani (BDI)
Ministër i Mbrojtjes: Radmila Sheqerinska (LSDM)
Ministër i Punëve të Jashtme: Nikolla Dimitrov (LSDM)
Ministër i Punëve të Brendshme: Oliver Spasovski (LSDM)
Ministër i Shëndetësisë: Arben Taravari (Alenca për Shqiptarët)
Ministër i Financave: Dragan Tevdovski (LSDM)
Ministër i Ekonomisë: Kreshnik Bekteshi (BDI)
Ministër i Drejtësisë: Bylen Saliu (BDI)
Ministër i Arsimit: Renata Deskoska (LSDM)
Ministër i Punës: Mila Carovska (LSDM)
Ministër i Transportit: Goran Sugarevski (LSDM)
Ministër i Ambientit: Sadulla Duraku (BDI)
Ministër i Pushtetit Lokal: Suhejl Fazliu (Alenca për Shqiptarët)
Ministër i Kulturës: Robert Alagjozovski (LSDM)
Ministër i Bujqësisë: Lupço Nikolovski (LSDM)
Ministër i Informacionit: Damjan Mançevski (LSDM)
Ministër pa portofol: Ramiz Merko (BDI)
Ministër pa portofol: Edmond Ademi (LSDM)
Ministër pa portofol: Koço Angjushev (LSDM)
Ministër pa portofol: Robert Popovski (LSDM)
Ministër pa portofol: Adnan Qahil (Lëvizja e Turqve)
Ministër pa portofol: Samka Ibrahimovski (LSDM)
Ministër pa portofol: Zoran Shapuriq (PLD)
Ministër pa portofol: Zorica Apostolovska (LSDM)