BE mirëpret zgjedhjen e Qeverisë së Maqedonisë

BE është e gatshme të mbështesë punën e Qeverisë, si dhe të opozitës, në mënyrë që të zbatohen të gjitha pjesët e Marrëveshjes së Përzhinës

Shefja e politikës së jashtme të Bashkimit Evropian, Federica Mogherini, dhe komisionari i BE-së për zgjerim, Johannes Hahn, kanë përshëndetur zgjedhjen e Qeverisë së re të Maqedonisë. “BE është e gatshme të mbështesë punën e Qeverisë, si dhe të opozitës, në mënyrë që të zbatohen të gjitha pjesët e Marrëveshjes së Përzhinës (për zgjidhjen e krizës politike)”, thuhet në deklaratën e përbashkët.

Mogherini dhe Hahn kanë shfaqur shpresën se partitë parlamentare do t’i lënë dallimet mënjanë dhe do të punojnë bashkërisht në agjendën e reformave, nga të cilat do të përfitojë e gjithë Maqedonia, citon REL.

“Kjo është e rëndësishme për rikthimin e vendit në rrugën evropiane – proces të cilin qytetarët e duan dhe e meritojnë”, kanë thënë Mogherini dhe Hahn.

Parlamenti i Maqedonisë ka zgjedhur mbrëmë qeverinë e udhëhequr nga lideri opozitar, Zoran Zaev, duke i dhënë fund bllokadës gjashtëmujore politike.

Ndryshe, mbrëmë Parlamenti i Maqedonisë me 62 vota pro,  44 kundër dhe 5 abstenime votoi qeverinë e re reformatore të Maqedonisë të drejtuar nga kryeministri i ri, Zoran Zaev. Ekzekutivi i ri i Maqedonisë është i formuar nga Lidhja Social Demokrate e Maqedonisë (LSDM), Bashkimi Demokratik për Integrim (BDI) dhe Aleanca për Shqiptarët (LR-PDSH dhe RDK).

Qeveria e re reformatore e kryesuar nga Zoran Zaev ka këto ministra:

Zëvendëskryeministër: Hazbi Lika

Zëvendëskryeministër: Bujar Osmani

Ministër i Mbrojtjes: Radmila Sekerinska

Ministër i Punëve të Jashtme: Nikola Dimitrov

Ministër i Punëve të Brendshme: Oliver Spasovski

Ministër i Financave: Dragan Tevdovski

Ministër i Ekonomisë: Kreshnik Bekteshi

Ministër i Drejtësisë: Bilen Saliu

Ministër i Shëndetësisë: Arben Taravari

Ministër i Arsimit dhe shkencës: Renata Deskovska

Ministër i Punës dhe politikës sociale: Mila Carevska

Ministër i Transportit dhe lidhjeve: Goran Sugarevski

Ministër i Ambientit jetësor dhe planifikimit hapësinor: Sadulla Duraku

Ministër i Pushtetit lokal: Suhejl Fazliu

Ministër i Kulturës, rinisë dhe sportit: Robert Alagjozovski

Ministër i Bujqësisë: Ljupcho Nikolovski

Ministër i Shoqërisë informative dhe administratës: Damjan Manchevski

Ministra pa resor: Ramis Merko, Edmond Ademi, Koco Angjushev, Robert Popovski, Adnan Qahil, Samka Ibraimoski, Zoran Shapuriq, Zorica Apostolovska.

---