Shqipëria heq vizat për shtetasit e Rusisë

Shtetasit rus mund të vizitojnë Shqipërinë pa viza, vetëm gjatë periudhës së verës, 31 maj -15 nëntor

Në prag të hapjes së sezonit turistik, Qeveria e Shqipërisë ka vendosur t’ua heq vizat të gjithë shtetasve rus të cilët dëshirojnë ta vizitojnë shtetin shqiptar gjatë periudhës 31 maj – 15 nëntor 2017. Ky vendim është marrë pas propozimit të bërë nga tri dikaster të Këshillit të Ministrave në Tiranë.

Sipas një njoftimi, kërkesën për heqjen e vizave e ka bërë ministri i Punëve të Jashtme dhe ministri i Punëve të Brendshme, me sugjerim edhe të Ministrisë së Zhvillimit Ekonomik, Turizmit, Tregtisë dhe Sipërmarrjes.

Sipas këtij vendimi, shtetasit nga vendet e mësipërme, kanë të drejtë të hyjnë në Republikën e Shqipërisë, me pasaportë pa vizë. Heqja e vizave bëhet me qëllim tërheqjen e turistëve të huaj për këtë sezon vjetor.

Regjimi pa viza për shtetasit rus është aplikuare dhe viteve të tjera gjatë periudhës së verës nga autoritetet shqiptare. Regjimi pa viza përfshin vetëm udhëtimet turistike private dhe udhëtimet njohëse, nuk përfshin vizat e punës. Ndryshe në verën e vitit 2012 Shqipëria u vizitua nga rreth 10 mijë shtetas rusë. Autoritetet vendase presin rritje të fluksit turistik nga Rusia edhe gjatë verës së këtij viti.