Ku është më mirë të jesh fëmijë?

Zvicra, në vendin e 16-të në botë

Një e katërta e të gjithë fëmijëve janë të privuar nga fëmijëria e tyre në mbarë botën, sipas një raporti nga Organizata për të drejtat e fëmijëve “Save the Children”, kryesisht për shkak të luftës dhe varfërisë. Rreth 700 milionë fëmijë në mbarë botën vuajnë nga luftërat, braktisja dhe dhuna.

Sipas një raporti të “Save the Children” për vitin 2017, Nigeria është vendi më i keq në botë për të qenë fëmijë.

Norvegjia dhe Sllovenia figurojnë në dy pozicionet kryesore në fillim të listës, si vendet më të mira për fëmijët, të ndjekura nga Finlanda, Holanda, Suedia, Portugalia, Islanda, Irlanda, Italia dhe Belgjika.
Zvicra, bashkë me Japoninë, figuron në vendin e 16-të në raportin e titulluar “Fundi i fëmijërisë” që klasifikon 127 vende, nga më i miri te më i keqi, në një përpjekje për të zbuluar arsyet kryesore përse fëmijëria përfundon më herët në disa vende të caktuara.

Në këtë listë Shqipëria renditet e 71-ta mes 127 vendeve, e lënë pas nga shtete si Mongolia, Fixhi, Malajzia, etj.

Rangimi është bërë duke matur nivelin mesatar të performancës në 8 tema: vdekshmëria nën 5 vjeç, kequshqyerja që ndal rritjen, fëmijët e pashkolluar, puna e fëmijëve, martesat e hershme, lindjet tek adoleshentët, zhvendosjet nga konfliktet dhe vrasjet e fëmijëve.