“15 vjet albinfo.ch”, motoja e numrit më të ri të magazinës albinfo.ch

Ky numër i është kushtuar jubileut të rëndësishëm jo vetëm për platformën por edhe për informimin dhe peizazhin medial shqiptar në Zvicër e në diasporë

Numri më i ri revistës vë në fokus përvjetorin e 15-të Albinfo.ch

Doli numri më i ri i revistës sonë, albinfo.ch. Ky numër i është kushtuar 15 vjetorit të platformës mediale albinfo.ch, këtij jubileu të rëndësishëm jo vetëm për platformën por edhe për informimin dhe peizazhin medial shqiptar në Zvicër e në diasporë.

Duke shënuar këtë jubile, platforma jonë vlerëson kontributin e institucioneve zvicerane që ndihmuan në themelimin e saj dhe lexuesit në radhë të parë por edhe partnerët afaristë dhe të tjerë, që bënë të mundur ngritjen dhe zhvillimin e Albinfo.ch.

Në këtë numër jubilar siç e do rendi, me editorialet e tyre paraqiten themeluesit dhe drejtuesit aktualë të Albinfo.ch. Ata bëjnë një rekapitullim të punës së platformës nga themelimi deri më sot, duke sjellë në kujtesë zhvillimin e saj me sfidat dhe sukseset që e kanë shoqëruar këtë zhvillim. Këtu sigurisht gjejnë vend edhe emocionet që lidhen pashkëputshëm me përjetimin e momentit, mund të themi historik, të themelimit të mediumit.

Sidoqoftë, përvjetori i Albinfo.ch nuk është patjetër arsye vetëm për të festuar. Në këtë numër të revistës kemi mjaft artikuj në të cilët pasqyrohet jeta e diasporës, me problemet, zhvillimin dhe arritjet e diasporës dhe me to edhe të albinfos, e cila që nga fillimi është shoqëruese besnike e të gjitha këtyre.

Në fokus të revistës janë një numër afaristësh të cilët kanë lënë Zvicrën për të investuar në Kosovë ose të tillë që me veprimtarinë e tyre japin kontribut në marrëdhëniet ekonomike të Kosovës me Zvicrën. Ata prezantojnë zhvillimin e bizneseve të tyre duke trimëruar edhe të tjerët që të shqyrtojnë kthimin e tyre fizik ose të investimeve të tyre në Kosovë.

Në këtë numër të revistës gjejnë vend sigurisht edhe rubrikat e rregullta standarde të saj.

Revistën mund ta siguroni, sikur dhe deri më tani, në shumë ambiente kompanish, lokale dhe mese të tjera që frekuentohen nga shqiptarët në Zvicër.

 

 

---