Stabiliteti financiar i vendit, i dyshimtë për FMN-në

Fondi Monetar Ndërkombëtar i ka kërkuar Qeverisë së Kosovës që ta shesë Postën dhe Telekomin brenda muajve të parë të 2012-ës, nëse do që të ketë stabilitet financiar.

Në rast se Qeveria dështon që edhe brenda këtij afati të shesë kompaninë publike më fitimprurëse në vend, atëherë FMN-ja kërkon futjen e masave të rrepta në tkurrjen e shpenzimeve nga buxheti në sektorë të cilët nuk konsiderohen shumë të nevojshëm.

Kjo nënkupton shkëputje financiare në sektorë për të cilët nuk ka dhënë përgjigje Ministria e Financave, shkruan Koha Ditore.

Sipas kësaj gazette, stafi i Fondit Monetar Ndërkombëtar që ka qëndruar në Kosovë gjatë nëntorit ka arritur mirëkuptimin me autoritetet vendëse që buxheti i të ardhshëm mos të ketë deficit më të lartë se 3.2 për qind të GDP-së.

Stafi ka kërkuar nga kabineti qeveritar që të kufizojë shpenzimet në rroga dhe të bëjë reforma në sektorin e energjisë, në mënyrë që të zvogëlojë nevojën për mbështetje buxhetore.

“Në rast se nuk do të ketë progress të qartë drejt privatizimit të PTK-së në muajt e parë të vitit 2012, masa shtesë mund të jenë të nevojshme për të garantuar se Qeveria ka mbulesë adekuate në të holla gjatë gjithë vitit”, thuhet në konkluzionet preliminare të nxjerra pas vizitës së stafit të Fondit Monetar Ndërkombëtar, raporton KOha Ditore.