Do të hapim qendra kulturore në diasporë, thotë Makolli

Jemi në fazën përfundimtare për të hapur Qendrën Kulturore të Kosovës në Turqi. Për vitin 2012 parashihet edhe hapja e dy të tjerave

Ministri i Diasporës, Ibrahim Makolli ka thënë se hapja e Qendrave Kulturore të Kosovës në diasporë mbetet prioritet i kësaj Ministrie për 2012-shin.

“Tash jemi në fazën përfundimtare të marrëveshjes me Turqinë për të hapur Qendrën Kulturore të Kosovës në Turqi. Ndërkaq, për vitin 2012, po ashtu, parashihet edhe hapja, ose fillimi i procedurave për hapjen e dy qendrave të tjera kulturore që i bien tre gjithsej në këtë fazë të parë”, ka deklaruar Makolli.

Makolli në konferencën e fundvitit, ka prezantuar punën dhe të arriturat e kësaj ministrie gjatë këtij viti.

Ministri i Diasporës, Ibrahim Makolli, ka theksuar se mësimi plotësues në gjuhën amtare në diasporë mbetet prioritetet kryesore i Ministrisë së Diasporës dhe për vitin e ardhshëm, duke e konsideruar si element kryesor të ruajtjes së identitetit.

“Në bashkëveprim edhe me Ministrinë e Arsimit, po ndërmarrim veprime përmes së cilave do të merret nën përkujdesje nga ana e shtetit mësimi plotësues në diasporë”, ka deklaruar Makolli.

Gjithashtu Ministri Makolli, ka thënë se orientimi i kapitalit ekonomik mbetet një prej prioriteteve kryesore të Ministrisë se Diasporës.