U protestua kundër ekstradimit të Shemsi Nuhiut nga Zvicra në Serbi

"Ekstradimi i shtetasit kosovar në Serbi, bie në kundërshtim me vendimet e Qeverisë zvicerane, për njohjen e shtetit të Kosovës"

Shumë qytetarë të Kosovës, kanë protestuar të mërkurën para Ambasadës së Zvicrës në Prishtinë

Protestuesit kanë shprehur pakënaqësinë dhe mospajtimin me arrestimin e shtetasit të Kosovës, Shemsi Nuhiu, nga policia zvicrane, në bazë të një urdhër-arrestit të lëshuar nga Serbia. 

Ata i kanë bërë thirrje Zvicrës të mos e ekstradojë në Serbi Nuhiun, ashtu siç po kërkonjnë autoritetet e këtij shteti.  

Përfaqësuesi i Organizatës “Vatra”, Bejtullah Kadriu,  ka thënë se pakënaqësinë dhe mospajtimin e tyre përmes Ambasadës së Zvicres, duan t’ia drejtojnë Konfederatës zvicerane.  

“Shemsi Nuhiu është shtetas i Republikës së Kosovës. Andej ne e konsiderojmë jo të drejtë dhe jo legjitime tendencën e Serbisë për ndërhyrjen juridike në Republikën e Kosovës, e sidomos të ngrejë akuza kundër qytetarëve të saj, në periudha kohore kur Serbia nuk ka pasur qasje juridike dhe fizike në Republikën e Kosovës. Ngritja e aktakuzës, kundër ‘grupit të Gjilanit’ në bazë të së cilës është arrestuar Shemsi Nuhiu, është vazhdimësi e veprimeve plotësisht politike”, ka deklaruar Kadriu.  

Sipas tij, Prokuroria për krime lufte e Serbisë, ka ngritur një aktakuzë fantome kundër disa qytetarëve shqiptar të njohur si grupi i ‘Gjilanit’. 

Ekstradimi nga autoritetet zviceranë e Shemsi Nuhiut për në Serbi, sipas tij,  bie në kundërshtim me vendimet e Qeverisë zvicerane, për njohjen e shtetit të pavarur të Kosovës.  

Kërkesën për mos ekstradim të shtetasit kosovar Shemsi Nuhiut tek autoritetet serbe, tre anëtarë të organizatës “Vatra” ia dorëzuan Ambasadës së Zvicrës në Kosovë.