Drews: Lëvizja e lirë është qëllimi, nuk do të pranojmë kurrfarë rezultati tjetër

Komandanti i KFOR-it, Erhard Drews, ka deklaruar se situata në Kosovë është gjithkund tjetër e mirë, përveç në veri. Ai ka theksuar se shpreson që rezultatet e dialogut mes Kosovës dhe Serbisë të implementohen sa më shpejtë, në mënyrë që njerëzve në terren t’u mundësohet jetë më e mirë.

Ai ka qartësuar se veprimet e KFOR-it nuk kanë qenë për shkak të presionit të Prishtinës.

“Vendimet për bllokimin e rrugëve për mua janë të papranueshme. E di se shumë serbë nga veriu nuk janë të kënaqur për shkak të këtyre barrikadave dhe ajo që duan është që të vazhdojnë të bëjnë jetë normale”, ka deklaruar ai për gazetën serbe ‘Novosti’.

Sipas tij, ndalimi i EULEX-it, i KFOR-it është i papranueshëm. “Lëvizja e lirë është qëllimi i misionit tonë dhe ne nuk do të pranojmë kurrfarë rezultati tjetër”, ka theksuar Drews.

Drews ka thënë se KFOR-i nuk ka ndonjë pozicion sa i përket çështjes se serbët e veriut pohojnë se i takojnë shtetit të Serbisë e jo shtetit të Kosovës.

Por, ai ka thënë për ‘Novostin” se ata duhet të lëvizin dhe të shohin vendbanimet tjera me serbë në Kosovë, ku raportet ndëretnike janë shumë të mira.