Produktet nga Ballkani, pa doganë në vendet e BE-së

BE ri-vendos preferencat e veçanta autonome të tregtisë për Ballkanin Perëndimor deri në 2015

Bashkimi Evropian ka rivendosur preferencat autonome tregtare të jashtëzakonshme, të cilat ua jep të gjitha vendeve të Ballkanit Perëndimor, deri në fund të vitit 2015.

Që nga 1 janari 2011 ekonomitë e vendeve të Ballkanit Perëndimor do të përfitojnë qasje të pakufizuar pa doganë në tregun e BE. Kjo nënkupton që pothuajse të gjitha produktet me origjinë në këto vende dhe territore fitojnë lehtësira sa i përket qarkullimit të mallrave të tyre.

Këto preferenca do t`u mundësojnë të gjitha vendeve të Ballkanit Perëndimor të përfitojnë në të ardhmen nga regjimi tregtar preferencial, gjë që tejkalon trajtimin e bërë deri më tash nga MSA.

Në vitin 2000 Bashkimi Evropian në Rregulloren e tij (EC) Nr 2007/2000) kishte paraparë qasje të pakufizuar, pa doganë në tregun e BE për shumicën e produkteve me origjinë nga rajoni i Ballkanit Perëndimor (Shqipëria, Bosnja dhe Hercegovina, Kroacia, ish Republika Jugosllave e Maqedonisë, Mali i Zi dhe Serbia).

Vetëm produktet si vera, sheqeri, produkte të caktuara dhe të peshkimit dhe lloje të ndryshme të produkteve nga mishi i gjedheve lejoheshin që të hyjnë në tregjet e BE-së, në bazë të kuotave tarifore preferenciale, të negociuara sipas MSA. Ky regjim u ripërtëri në vitin 2005, dhe përfundoi më 31 dhjetor 2010.

Për vazhdimin e regjimit preferncial Parlamenti Evropian votoi në favor të propozimit të Komisionit më 13 tetor 2011 dhe Këshilli e miratoi atë më 24 nëntor 2011.

Rregullorja e miratuar sot ka veprim retroaktiv, duke mundësuar kështu edhe kompensimet përkatëse për periudhën nga fillimi i vitit 2011, njofton KE Press.