Përfitojnë studentët nga diaspora

Sipas kryeministrit të Shqipërisë këtë vit kanë përfituar 67 kandidatë, duke garantuar se brenda vitit 2013 do të përfitojnë 300 studentë

Kryeministri shqiptar Sali Berisha ka premtuar sot në Tiranë se përmes fondit të ashtuquajtur të ekselencës do të përfitojnë shkollim jashtë vendit edhe studentët e shkëlqyer nga Kosova, Maqedonia dhe diaspora.

“Duhet të bëjmë gjithçka që nga ky fond të përfitojnë shqiptarët nga Kosova, Maqedonia, diaspora e çdo shqiptar kudo që ndodhet”, tha Berisha.Sipas kryeministrit të Shqipërisë këtë vit kanë përfituar 67  kandidatë, duke garantuar se brenda vitit 2013 do të përfitojnë 300 kandidatë.

Kreu i qeverisë shqiptare e cilësoi diplomimin e studentëve të ekselencës si një simbol të forcës së mendimit, duke siguruar se parësore për qeverinë është rritja e cilësisë së mësimdhënies.