Gjilanasit nënshkruajnë peticionin kundër ekstradimit të Shemsi Nuhiut

Më shumë se 5 mijë qytetarë kanë nënshkruar peticionin kundër ekstradimit të Shemsi Nuhiu nga autoritetet zvicerane për në Serbi

Iniciatorët e peticionit, përfaqësues nga Shoqata e të Shpërngulurve nga Kosova Lindore “Vatra” me seli në Gjilan, kanë thënë për mediet lokale se ky aktivitet i mbledhjes së nënshkrimeve do të vazhdojë deri të shtunën.

Ndryshe, ditë më parë, kishte edhe një protestë para Ambasadës së Zvicrës në Prishtinë, ku protestuesit kishin bërë thirrje këtij vendi të mos e ekstradojë në Serbi Nuhiun, ashtu siç po e kërkojnë autoritetet e këtij shteti.

Përfaqësuesit të shoqatës “Vatrës” mendojnë se deri të shtunën këtë peticion do ta nënshkruajnë mbi 10 mijë qytetarë dhe se ai dokumentacion do t’i dërgohet ekipit të avokatëve mbrojtës të Shemsi Nuhiut në Zvicër, duke shpresuar se do të ndikojë në mos ekstradim të tij.

Gjatë muajit dhjetor edhe  komiteti në Zvicër për kundërshtimin e ekstradimit të Shemsi Nuihiut në Serbi, ua ka dorëzuar një peticion me 5152 nënshkrime autoriteteve zvicerane të Ministrisë së Drejtësisë në Bernë.

Shtetasi i Kosovës, Shemsi Nuhiu me prejardhje nga Lugina e Preshevës dhe me qëndrim të rregullt në Vevey, kantoni Vaud është arrestuar më 14 prill nga autoritetet zvicerane.

Arrestimi i tij është bërë duke u bazuar në një aktakuzë të autoriteteve të Serbisë dhe ajo e ngarkon atë për krime lufte, të kryera, sipas saj, në Kosovë.