Tadiq vjen në Kosovë nga ajri

Presidenti i Serbisë, Boris Tadiq, bashkë me ambasadorin rus dhe atë bjellorus, të akredituar në Beograd, do të vijnë në Kosovë. Këtë “vizitë” ata do ta realizojnë duke shfrytëzuar linjën ajrore dhe atë përmes helikopterëve të paqeruajtësve të NATO-s në Kosovë, shkruan Zëri

I pari i shtetit serb, i cili vjen me ftesë të peshkopit Teodosije, me ambasadorët Aleksandër Konuz dhe Vladimir Qushin do të marrin pjesë në festimin e Krishtlindjeve ortodokse në Deçan dhe ata njashtu do të jenë pjesëmarrës në Patrikanën e Pejës, ku do të mbahet liturgjia e shenjtë për lindjen e Krishtit.

Sipas kësaj gazete për të pasur siguri më të madhe, KFOR-i ka angazhuar helikopterë, të cilët do të bëjnë transportimin e personaliteteve nga Beogradi dhe të cilët do të vëzhgojnë situatën nga qielli në tërë Kosovën e kryesisht në regjionin e Dukagjinit.

Zëri duke cituar burime, shkruan se KFOR-i së bashku me EULEX-in do të përkujdesen për sigurinë e afërt të presidentit serb, i cili edhe këtë vit është zotuar se do të vijë për të dhënë deklarata religjioze dhe jo politike.

Policia e Kosovës në anën tjetër do të përkujdeset për sigurinë e përgjithshme në vend. Kjo e fundit bashkë me KFOR-in e EULEX-in kanë dhënë pak informacione në lidhje me planin e veprimit për të pritur presidentin e Serbisë.

Sipas, zëvendëskryeministrit Hajredin Kuçi, Tadiq vjen në Kosovë me miratimin e Qeverisë.

Sipas tij, autoritetet kosovare kanë kërkuar që presidenti serb Tadiq ta trajtojë vizitën e tij në Kosovë si vizitë religjioze dhe jo të karakterit politik.