Neglizhenca e komunës bën që Ksamili e Saranda të mbyten nga kanalizimet

Pavarësisht se sezoni turistik në plazhet shqiptare është thuajse në përfundim, jo të pakta kanë qenë problemet e shfaqura me "ujërat e zeza", sidomos në Sarandë dhe Ksamil

Ujërat e zeza ia kanë prishur bukurinë plazheve të bukura në detin Jon, në Ksamil dhe Sarandë. Edhe pse sezoni turistik tashmë është në përfundim e sipër, kontaminimi nga ujërat e zeza e bën të pamundur larjen dhe qëndrimin në plazhet e këtyre të vendeve në Jug të Shqipërisë.

Para disa ditësh në qytetin e Sarandës, një çarje e kanalizimeve të ujërave të zeza, solli largimin e turistëve nga plazhet e qytetit pasi ato arritën të kontaminonin ujin  e detit. Por, problemi tashmë duket se është thelluar edhe më tepër, pasi në lagjen “Kodër”, për më shumë se një javë, banorëve të një blloku pallatesh u është dashur të jetojnë mes ujërave të zeza.

Banorët shprehen se prej një jave kanë njoftuar Ujësjellës Kanalizimet Sarandë, por nuk kanë marrë një zgjidhje për këtë situatë, raportojnë mediat shqiptare. Banorët thonë se Komuna e Sarandës është indiferente ndaj situatës së krijuar. Ndërsa kjo gjendje po ndikon shumë keq tek pushuesit, të cilët po mbesin të zhgënjyer pavarësisht bukurisë që ka Saranda.