Skip to content

Në Bernë, klinika mobile dentare ofron kontrolle për nxënësit në shkolla

Në qytetin e Bernës në Zvicër, kontrollet dentare për nxënësit po realizohen drejtpërdrejt në oborret e shkollave, përmes një klinike mobile dentare që udhëton nga një shkollë në tjetrën.

Nisma, e cila ka nisur pas pushimeve të vjeshtës, synon t’ua lehtësojë familjeve qasjen në shërbimet dentare dhe të kursejë kohën e prindërve. Kontrollet zhvillohen gjatë orarit mësimor, sipas klasave, ndërsa nxënësit mungojnë në mësim vetëm për disa minuta.

Sipas autoriteteve të qytetit, klinika mobile mundëson kontrollimin e një numri më të madh të fëmijëve dhe funksionon në mënyrë të pavarur gjatë gjithë ditës së punës.

Ky model është pjesë e riorganizimit të shërbimit stomatologjik shkollor, përgjegjësinë për të cilin në fillim të këtij viti e mori Universiteti i Bernës, përkatësisht klinikat e tij dentare, për shkak të vështirësive financiare të qytetit.

Nga viti 2027, ky riorganizim pritet t’i kursejë qytetit rreth një milion franga zvicerane në vit. Megjithatë, kontrollet vjetore dentare mbeten të detyrueshme për nxënësit, ndërsa prindërit vazhdojnë të kenë të drejtën të zgjedhin dentistin privat. Trajtimet dentare do të vazhdojnë të ofrohen në lokacionin e përhershëm në Bümpliz.