Bankat komerciale në Kosovë të interesuara për letrat me vlerë

Bankat komerciale në Kosovë kanë shprehur interesim të marrin pjesë në ankandin e letrave me vlerë të shpallur nga Qeveria e Kosovës.

Fillimi i lëshimit të letrave me vlerë është mirëpritur nga bankat komerciale që operojnë në Kosovë. Disa sish për Radio Kosovën kanë thënë se do të marrin pjesë në secilin ankand që pritet të shpallet nga Qeveria.

Zyrtarja për informim në bankën Raifaisen, Iliriana Tahiri, ka deklaruar se i plotësojnë kriteret për një gjë të tillë.

“Banka Raifaisen ka mjetet e nevojshme për të blerë letrat me vlerë, të cilat më pas mund të përdoren për mbështetjen e zhvillimit të projekteve të ndryshme në Kosovë”, ka deklaruar ajo.

Drejtoresha e Shoqatës së Bankave të Kosovës, Diturie Hoxha, thotë se të gjitha bankat janë të gatshme dhe i përmbushin kriteret që të marrin pjesë në ankand.

Qeveria e Kosovës, në fillim të kësaj jave, zyrtarisht ka filluar emetimin e letrave me vlerë. Fillimisht janë shpallur letra me vlerë prej 10 milionë eurosh.

Këshilltari politik i Ministrit të Financave, Menderes Ibra, ka thënë se Ministria e Financave, në kuadër të projeksioneve të buxhetit të këtij viti, ka paraparë të hyrat nga emetimi i letrave me vlerë, deri në 74 milionë euro, që do të hyjnë në rrjedhat e buxhetit.