Falimentojnë rreth 1000 biznese në Kosovë

Ekspertë të çështjeve ekonomike thonë se shkaktarët mbeten mungesa e qasjes në kapital dhe infrastruktura ligjore e parregulluar mirë

Në Kosovë, vetëm gjatë vitit 2011, kanë falimentuar rreth 1000 biznese, bëjnë të ditur zyrtarë të Ministrisë së Tregtisë dhe Industrisë. Arsyet e shuarjes së këtyre bizneseve, sipas tyre, nuk dihen. Por, ekspertë të çështjeve ekonomike thonë se shkaktarët kryesorë mbeten mungesa e qasjes në kapital dhe infrastruktura ligjore e parregulluar mirë.“Në vitin 2011 kanë qenë të regjistruara 7809 kompani, kanë falimentuar 959 dhe kanë ndryshuar statusin 4697 kompani. Këto janë të dhëna të regjistruara në Agjencinë për Regjistrimin e bizneseve që vepron në kuadër të Ministrisë së Tregtisë dhe Industrisë, tha zëdhënësja e Ministrisë së Tregtisë dhe Industrisë, Arta Istrefi.Në anën tjetër, pronarë të bizneseve të falimentuara, të kontaktuar kohë më parë nga Radio Evropa e Lirë, kishin theksuar se kanë shuar bizneset e tyre, për shkak të ngarkesave të larta tatimore dhe rënies së fuqisë blerëse. Ata kishin thënë se institucionet e Kosovës nuk po krijojnë kushte për të zhvilluar aktivitetin e tyre.

Njohësit e çështjeve ekonomike, fajin për shuarjen e bizneseve, ua hedhin edhe vetë pronarëve. Milazim Abazi, ekspert i çështjeve ekonomike, thotë se arsyet janë të shumta, por një prej tyre është edhe mungesa e menaxhimit të mirëfilltë të bizneseve.

Sipas Abazit, në falimentimin e bizneseve ndikon edhe mosfunksionimi i organeve të drejtësisë, përkatësisht mosfunksionimi i gjykatave dhe kadastrave.

Ndryshe, ekspertët për çështje ekonomike thonë se shuarja e rreth 1000 bizneseve brenda një viti, duhet të jetë sinjal alarmues për institucionet kosovare, në mënyrë që të ndërmarrin hapa konkretë për ta përkrahur sektorin privat. Ata shprehin shqetësimet e tyre për faktin se me shuarjen e bizneseve, po shuhen shumë vende të punës, çka rrjedhimisht ndikon edhe në rritjen e shkallës së varfërisë në vend.