HRW: Kosova me pak progres në të drejtat e njeriut

Sistemi i drejtësisë mbetet i dobët, me gjithë përpjekjet për të ndjekur penalisht të dyshuarit për korrupsion dhe krime lufte

Organizata Human Rights Watch ka vlerësuar përparimin e të drejtave të njeriut gjatë vitit të kaluar në më shumë se 90 vende të botës.

Raporti vlerëson së në Kosovë situata e të drejtave të njeriut ka shënuar përmirësim të vogël gjatë 2011-shit.

Sistemi i drejtësisë, sipas këtij raporti, mbetet i dobët, me gjithë përpjekjet për të ndjekur penalisht individë të dyshuar për korrupsion dhe për krime lufte.

Sipas kësaj organizate zgjedhjet e përgjithshme të dhjetorit 2010 në Kosovë nuk kanë shënuar ndonjë incident të dhunshëm, por janë dëmtuar nga parregullsitë që i kanë bërë vëzhguesit ndërkombëtarë t’i vënë në pikëpyetje rezultatet.

“Tensionet ndërmjet serbëve dhe shqiptarëve në veri të Kosovës janë intensifikuar në muajin gusht, kur autoritetet kosovare kanë vënë nën kontroll vendkalimet kufitare me Serbinë”, thuhet në raport.

Sipas HRW, serbët në veri kanë mbajtur bllokada dhe protesta që kanë vazhduar deri në muajin nëntor.

“Një polic i Kosovës është vrarë nga protestuesit serbë gjatë një përleshjeje kufitare në fund të korrikut. Ndërkaq, në shtator, janë plagosur disa serbë dhe paqeruajtës të KFOR-it, në një konfrontim mbi bllokadat serbe pranë pikave kufitare”, thuhet në raport.

Po sipas këtij raporti, komuniteti rom, ashkali dhe egjiptas mbetet i margjinalizuar dhe i cenuar nga diskriminimi.

Raporti i HRW, dokumenton abuzime me të drejtat e njeriut në mbarë botën, përfshirë, shkelje të ligjeve të luftës në Libi dhe Afganistan, censurë të internetit në Iran dhe Tajlandë, probleme me zgjedhjet në Rusi, keqtrajtime të emigrantëve në Evropën Perëndimore, shtypje të lirive fetare në Indonezi dhe Arabinë Saudite, tortura në Pakistan dhe Uzbekistan, si dhe dënime pa gjyq në Malajzi dhe nga SHBA-ja.