Privatizimi i kompleksit turistik “Brezovica” mund të bëhet gjatë këtij viti

Komisioni Evropian ka hartuar një masterplan për revitalizimin e kompleksit, të cilin e prezanton në shkurt.

Zyrtarja për informim në Zyrën Ndërlidhëse të këtij Komisioni, Fjolla Çeku, ka deklaruar për Radio Kosovën se gjatë studimit është vlerësuar se një hapësirë pranë qendrës aktuale të skijimit ofron më shumë potencial për zhvillim.

“Prezantimi i masterplanit pritet të bëhet në shkurt dhe parashihen dy faza të zhvillimit: faza e parë parasheh zhvillimin e zonave të reja malore, të përshtatshme për një qendër të re turistike dhe faza e dytë shikon mundësitë e rehabilitimit të qendrës ekzistuese skitare në Brezovicë”, ka thënë ajo.

Brezovica është ndër ndërmarrjet më të mëdha kosovare, që nuk është privatizuar ende, për shkak të natyrës tejet komplekse. Por, privatizimi do të bëhet sivjet, thotë Drejtori menaxhues i Agjencisë Kosovare të Privatizimit, Shkëlzen Llukaj.

“Besoj që gjatë vitit 2012 ne do e bëjmë privatizimin e aseteve të ndërmarrjes shoqërore të Brezovicës, kurse për pjesën tjetër, besoj që Qeveria e Kosovës do të nxisë investitorët e huaj, të cilët mund të jenë të interesuar për asetet e ndërmarrjes shoqërore”,ka theksuar Llukaj.

E Ministria e Tregtisë dhe Industrisë, që kryeson grupin ndërministror për këtë kompleks, është duke përgatitur mbajtjen e një konference të investitorëve, thotë zyrtarja për informim në këtë Ministri, Arta Istrefi.

“Sipas përgatitjeve dhe parashikimeve, besojmë që në fillim të shkurtit do të mbahet konferenca, për shkak se kjo nuk varet vetëm nga ana jonë e ministrisë por edhe e donatorëve me të cilët jemi duke punuar deri në finalizimin e masterplanit”, ka theksuar ajo.

Istrefi shfaq shpresën se investitorët nuk do të mungojnë pavarësisht krizës në vendet e Eurozonës.

Zbatimi i masterplanit për revitalizimin të Brezovicës pritet të ndikojë në zhvillimin e zonës së Shtërpcës, në nxitjen e punësimit si dhe në përmirësimin e raporteve ndëretnike.

Por, derisa ky masterplan nuk është përfunduar ende, nuk bëhet e ditur as kostoja e përgatitjes së tij. /albinfo& radio kosova/