Berisha garanton hetimet e EULEX-it për raportin e Marty-t

Berisha në takim me Williamson-in u shpreh plotësisht dakord me institucionalizimin e bashkëpunimit midis autoriteteve shqiptare dhe EULEX

Kryeministri i Shqipërisë Sali Berisha e ka garantuar Kryeprokurorin e Task Forces Speciale hetimore të BE-së, Ambasadorin Clint Williamson, i cili drejton hetimet e EULEX-it në lidhje me pretendimet e ngritura në raportin e Dick Marty-t, për bashkëpunim të plotë për çuarjen në fund të hetimeve.

Berisha në takim me Williamson-in u shpreh plotësisht dakord me institucionalizimin e bashkëpunimit midis autoriteteve shqiptare dhe EULEX-it.

Ai ka treguar gatishmërinë e plotë që, sa më shpejt, të nënshkruhet　një marrëveshje apo të adoptohet legjislacioni i nevojshëm për krijimin e një kornize ligjore të plotë e të qartë, e cila që do t’i sigurojë EULEX-it zbatimin e plotë të mandatit të tij në hetimin e gjithanshëm të pretendimeve të raportit të Dick Marty-t.

Në përfundim të takimit u ra dakord që institucionet përkatëse të fillojnë menjëherë punën për hartimin e kësaj　kornize ligjore.

Williamson e ka falënderuar Berishën për pritjen në këtë vizitë të dytë të tij në Tiranë, e cila ka për qëllim vazhdimësinë e bashkëpunimit të vendosur gjatë vizitës së tij të mëparshme.

Williamson ka deklaruar se në takimet e zhvilluara deri tash kishte konstatuar gatishmërinë e plotë për bashkëpunim të qeverisë shqiptare　dhe e falënderoi Kryeministrin Berisha për këtë.