Lëvizja e të Papunëve, pritje te kryekuvendari

Kjo organizatë hulumton mënyrat e krijimit të kushteve për hapje të sa më shumë vendeve të reja të punës

Të mërkurën Kryetari i Kuvendit të Kosovës, Jakup Krasniqi ka pritur në selinë e tij përfaqësues të Lëvizjes së të Papunëve. Me këtë rast ai është shprehur se vlen të mbështetet çdo organizim që kontribuon në zbutjen e papunësisë.

Krasniqi u tha të papunëve se institucionet e Kosovës janë të angazhuara për ngritjen e gjithëmbarshme ekonomike të Kosovës, e në këtë frymë edhe për krijimin e kushteve për punësim më të madh të atyre që kërkojnë punë, shkruan telegrafi.com.

Ndërkaq, përfaqësuesit e kësaj Lëvizjeje e informuan lidhur me formimin e kësaj organizate, synimet dhe veprimtarinë e saj.

Ata theksuan se kjo organizatë është jopolitike, ndërsa bëjnë përpjekje për të zbutur papunësinë në Kosovë, duke hulumtuar edhe mënyrat e krijimit të kushteve për hapje të sa më shumë vendeve të reja të punës.

Organizata me emrin Lëvizja e të Papunëve është krijuar nga disa mërgimtarë të papunë, të kthyer rishtas në Kosovë.