Maqedonasit anuluan protestën e paralajmëruar në Strugë

Komiteti për Marrëdhënie Ndëretnike apeloi që institucionet shtetërore me të gjitha kapacitetet të merren me qetësimin e tensioneve

Të rinjtë maqedonas kanë hequr dorë nga protesta e paralajmëruar për në Stugë, kundër djegies së kishave dhe tensioneve të fundit në Maqedoni.

Protesta është anuluar për ditën e sotme, ndërsa ajo nuk përjashtohet që të zhvillohet gjatë ditëve të tjera.

Vendimi i të rinjve maqedonas ka pasuar pas një takimi të përbashkët midis sektorit civil, intelektualëve maqedonas dhe përfaqësuesve të Kishës Ortodokse Maqedonase, që u mbajt në Kishën Shën Gjergji në Strugë.

Në këtë takim është biseduar për incidentet dhe ngjarjet e fundit që tronditën Strugën dhe përpjekjet për të gjetur rrugëdalje si dhë për të ndihmuar për dalje nga kjo gjendje.

“BP” radio, duke iu referuar burimeve të pjesëmarrësve në këtë takim konsultativ, që është mbajtur në ambientet e kishës “Shën Gjergji” në Strugë, raporton se rinia maqedonase strugane ka heqë dorë nga protestat e paralajmëruara, duke anuluar këtë protestë për një kohë të pacaktuar.

Ndërkohë, Komiteti për Marrëdhënie Ndëretnike apeloi që institucionet shtetërore me të gjitha kapacitetet të merren me qetësimin e tensioneve të fundit.

Në mbledhjen e këtij trupi të gjithë pjesëmarrësit i kanë bërë thirrje edhe qytetarëve që të përmbahen nga provokimet dhe të punojnë në kultivimin e marrëdhënieve të mira ndërfetare dhe ndëretnike.

Avokati i Popullit në fjalën e tij theksoi se të gjitha palët duhet të përmbahen nga kjo situatë që ngjallë urrejtje, sepse në të kundërtën siç tha ai, do të thellohen ndarjet dhe do të krijohen tensione që askush nuk do ti dëshironte.

Reagime kanë shprehur edhe përfaqësuesit e komuniteteve fetare.

Deputetët e partive politike kanë shkëmbyer akuza dhe kritika lidhur me situatën e krijuar pas tensioneve të fundit.

Aktet e dhunës dhe tensionet janë dënuar edhe nga dy kryetarët e komunave, Ramiz Merko i Strugës dhe Pero Ilievski nga komuna e Vevçanit.

Në mbledhjen e Komitetit për Marrëdhënie midis komuniteteve kanë marrë pjesë përfaqësues të MPB-së, ministrive të tjera, organizata e Hendbollit, SHGM si dhe përfaqësitë diplomatike të SHBA-ve, Britanisë, Francës, Holandës, Bullgarisë, etj.