Austriakët të interesuar për turizmin kosovar

Janë dhënë premtime për fillimin e një bashkëpunimi në fushën e turizmit, për ngritjen e kapaciteteve në sektorin e hotelerisë dhe turizmit

 Shoqata e Turizmit Alternativ të Kosovës aktivitetin e saj të parë për sivjet e ka nisur me një vizitë zyrtare në Austri me ftese të Akademisë për Paqe dhe Siguri në Evropë.

 “Kryetari i SHTAK-ut, Baki Hoti dhe zëvëndës ministri i Tregtisë dhe Industrisë, Cüneyd Ustaibo, kanë vizituar Austrinë e epërme, përkatësisht qytetin Linz, dhe kanë qëndruar në disa qytete tjera të ketij vendi, me qellim të krijimit të kushteve për një bashkëpunim më të madh për zhvillimin e turizmit në Kosovë, dhe marrjes së përvojave për organizmin dhe menaxhimin e sektorit të turizmit në Republikën e Kosovës”, thuhet në kumtesën e SHTAK-ut.

Gjat kësaj vizite, Kryetari i SHTAK Hoti dhe zv.Ministri Ustaibo, kanë zhvilluar takime me disa kryetar komunash. Gjithashtu ata janë takuar me Ministrin e Ekonomisë, Punës, Turizmit, Sportit dhe Marrëdhënieve Evropiane, Viktor Sigl, si dhe shumë ekspert të fushës së turizmit.

Ata kanë vizituar edhe fshatra turistike, monumente kulturore dhe historike në këtij vendi.

“Ky delegacion ishte mysafir nderi në hapjen e panairit të turizmit në Linz, ku së bashku me Kryetarin e Linizit bënë hapjen e panairit”, thuhet në kumtesë.

Kryetari i Shoqatës se Turizmit Alternativ te Kosovës, Baki Hoti, vizitën e ka vlerësuar të suksesshme. Ai ka bërë të ditur se kanë marrë garanci për fillimin e një bashkëpunimi në fushën e turizmit, për ngritjen e kapaciteteve në sektorin e hotelerisë dhe turizmit, si dhe për përmirësimin e imazhit të Kosovës në arenën ndërkombëtare.