Arid Uka është stërvitur në kampet islamike në Bosnjë?

Deri tash mendohej se Uka është një fanatik i izoluar islamik, i cili për veprimet e tij është frymëzuar vetëm nga propaganda e internetit

Para gjykatës së lartë të landit, në Frankfurt vazhdon sot procesi gjyqësor kundër shtetasit gjerman me prejardhje kosovare Ardid Ukës, të akuzuar për atentatin e kryer para një viti në Aeroportin e Frankfurtit.

Në seancën e sotme pritet deklarata e një gazetari, në cilësinë e dëshmitarit, i cili thotë të ketë dëshmi se Arid Uka ka kryer stërvitje në një kamp islamik në Bosnjë.

Nga rrjedha e deritashme e procesit gjyqësor ka mundur të dëshmohet vetëm se Uka është një fanatik i izoluar islamik, i cili për veprimet e tij është frymëzuar vetëm nga propaganda e internetit.

Trupi gjykues mendon se pranimi i dëshmive duhet të përfundojë, pas marrjes në pyetje të dëshmitarëve, njofton dpa.

Në fillim të procesit, Arid Uka kishte pranuar se para 11 muajsh, në Aeroportin e Frankfurtirt ka vrarë dy ushtarë amerikanë dhe ka plagosur rëndë edhe dy të tjerë. Sipas akuzës, në këtë atentat mund të kishte pasur edhe më shumë viktima sikur Ukës të mos i bllokohej arma.