Nëse investoni 100 mijë euro, do ta merrni shtetësinë e Shqipërisë

Shefi i qeverisë shqiptare tha se duhet t’u jepet shtetësia shqiptare të gjithë të huajve, që investojnë në Shqipëri 100 mijë euro

Për këtë kryeministri i Qeverisë së Shqipërisë, Sali Berisha ka kërkuar të rishqyrtohet dhe përcaktohen standardet e reja në ligjin për shtetësinë, i miratuar në vitin 1994.

Kryeministri shqiptar e cilësoi shqyrtimin e këtij ligji si një çështje me rëndësi duke thënë se ligji duhet të përcaktojë detyrime të reja, që rrjedhin edhe nga marrëveshja për heqjen e vizave.

Shefi i qeverisë shqiptare theksoi se duhet t’u jepet shtetësia shqiptare të gjithë atyre personave të huaj, që investojnë në Shqipëri më shumë se 100 mijë euro.

“Është një masë që u jep një shkallë më të madhe sigurie atyre që vijojnë projekte në këtë vend, që duan të blejnë vila për të kaluar kohë, apo pushime në Shqipëri. Ligji duhet të përfshijë dekretin për shtetësinë, i miratuar nga Presidenti në vitet 1994, duhet ta inkorporojmë dhe përpunojmë. Ligji duhet të përcaktojë kushtet, në të cilat ata që kanë investuar 100 mijë euro marrin shtetësinë shqiptare”, deklaroi Berisha.

Sipas tij, shtetësinë shqiptare në përputhje me detyrimet që rrjedhin nga marrëveshja e heqjes së vizave duhet ta marrin edhe të gjithë qytetarët shqiptarë me origjinë shqiptare, duke nënkuptuar këtu shtetasit shqiptarë nga Kosova, Maqedonia apo edhe Diaspora.