Elezi: Toka ka kontaminim

Profesori kosovar Xhevdet Elezi, që ishte pjesë e projektit të financuar nga Komisioni Evropian për hulumtimin e ndotjes së tokës, tregon se konstatimet në atë raport janë të vërteta dhe s’kanë të bëjnë asgjë me tendenca siç po deklarojnë zyrtarët qeveritarë. Sipas tij, këto mostra na sinjalizojnë se ka ndotje të tokës dhe kontaminimi me metale të rënda mund të kalojë përmes zinxhirit ushqimor tek njerëzit.

Konstatimet e raportit të financuar nga Komisioni Evropian për ndotjen e tokës në Kosovë nuk janë shpikje të një individi, shkruan Express.

Profesori kosovar Xhevdet Elezi, që ishte pjesë e këtij projekti që udhëheq laboratorin “Agrovet”, mohon akuzat që janë bërë ndaj punës së tij dhe profesorit Wolfgang Spyra se kinse janë financuar nga struktura të caktuara për të nxjerrë rezultate shqetësuese.

Sipas gazetës Express, ai tregon se nga 1000 mostra të marra në tërë Kosovën, për shkak të kushteve janë përzgjedh vetëm 123 mostra, të cilat janë konsideruar që kanë pas nekrozë më të madhe apo koncentrim më të madh të ndotësve.

“Pra, në të cilat shkalla e vdekshmërisë së bimëve ka qenë më e madhe dhe për hir të buxhetit janë analizuar 123 bimë në pikëpamje të përmbajtjes së metaleve”, ka deklaruar Elezi.

Ndërkohë ministritë përgjegjëse, ajo e bujqësisë dhe ajo e mjedisit, kanë reaguar duke e kundërshtuar raportin.