Nuk i japim veriut status special, thotë Rexhepi

Ministri i Punëve të Brendshme, Bajram Rexhepi, e ka vlerësuar të domosdoshëm presionin e bashkësisë ndërkombëtare ndaj Serbisë, për integrimin e serbëve të veriut në jetën politike dhe institucionale të Republikës së Kosovës.

“Presioni ndërkombëtar ndaj Serbisë është i domosdoshëm, sepse problemi kryesor i mosintegrimit të serbëve të veriut është interferimi i shtetit serb në jetën e tyre”, ka thënë Rexhepi në një intervistë për “Epokën e Re”.

Ai edhe një herë, në emër të Qeverisë së Kosovës, i ka hedhur poshtë idetë që veriut t’i jepet status special.

“Zgjidhja për veriun e Kosovës duhet të gjendet vetëm brenda planit të presidentit Ahtisaari. Jemi shumë të interesuar që nëpërmjet proceseve demokratike t’i integrojmë edhe qytetarët serbë të veriut në jetën politike dhe institucionale”, ka theksuar Rexhepi.

Gjithashtu Rexhepi ka hedhur poshtë edhe katërpikëshin e presidentit të Serbisë, Boris Tadiq.

Sipas tij, Tadiq është duke hapur tema të tilla vetëm për konsum të brendshëm politike, sidomos në kohën kur Serbia do të ketë zgjedhje.