Rohan: Debati për fusnotën i ekzagjeruar

Ish-zëvendës kryengociatori i OKB-së në bisedimet për statusin e Kosovës, Albert Rohan, ka thënë se fusnota nuk ka kurrfer pasoje.

“Rezoluta 1244 është ajo që është zbatuar së fundmi dhe sipas pikëpamjes sime është dokument historik. Ajo parasheh dialog politik për çështjen e statusit, ndërsa ky dialog është zhvilluar dhe ka rezultuar me deklaratën e pavarësisë. Prandaj, deklarata e pavarësisë në njëfarë mënyre është konsekuencë e e kësaj rezolute. Unë me të vërtetë nuk e kuptoj insistimin e Serbisë që ta përmend këtë rezolutë, e cila i takon së kaluarës”, ka thënë ai.

Në një intervistë për Radion Evropa e Lirë, Rohan, ka deklaruar se rasti i Kosovës nuk mund të krahasohet me atë të Maqedonisë.

Ndërsa tërë debatin për fusnotën Rohan e konsideron të ekzagjeruar.

“Askush nuk i lexon fusnotat, nëse bëhet fjalë për Republikën e Kosovës, apo Kosovën. Për shembull në vendin tim, askush nuk thotë Republika Federale e Austrisë në takimet ndërkombëtare. Shkruhet vetëm Austria, sikurse nuk i thonë as Gjermanisë, Republikë Federale e Gjermanisë e të tjera:, ka thënë Rohan për REL.