EULEX-i: Nuk kemi marrëveshje me Serbinë

Zyrtarët e EULEX-it kanë përjashtuar mundësinë për marrëveshje me Beogradin rreth funksionimit të këtij misioni në veri të Kosovës

　

Misioni i Bashkimit Evropian për Sundim të Ligjit -EULEX, ka mohuar të jetë bërë ndonjë marrëveshje ndërmjet autoriteteve në Serbi dhe shefit të tij, Xavier de Marnach gjatë vizitës së këtij të fundit në Beograd.

Një zëdhënëse e këtij misioni, Irina Guduleviq i ka thënë Radio Kosovës se asgjë që ka të bëjë me lirinë e lëvizjes dhe qasjen e pakushtëzuar të EULEX-it në këtë pjesë nuk do të negociohet. Zyrtarët e EULEX-it kanë përjashtuar çfarëdo mundësie për marrëveshje me zyrtarët në Beograd rreth funksionimit të këtij misioni në veri të Kosovës.

　

Ajo ka theksuar se Marnach u ka thënë autoriteteve në Beograd se EULEX do të vazhdojë punën për sundimin e ligjit në veri pa vonesa dhe pa kushte.

　

“Dëshiroj të qartësoj që EULEX-i nuk ka bërë dhe as nuk do të bëjë ndonjë marrëveshje sepse liria e lëvizjes nuk është e negociueshme. Ne nuk bëjmë marrëveshje kur është puna e lirisë dhe qasjes së plotë në veri”, ka theksuar ajo.

　

Guduleviq ka mohuar gjithashtu që heqja e disa barrikadave që janë bërë së fundi, të jetë rezultat i ndonjë marrëveshje midis EULEX-it dhe autoriteteve në Beograd.

　

“Ne nuk bëjmë ndonjë marrëveshje rreth barrikadave. Qëndrimi ynë rreth barrikadave është i ditur tashmë dhe ai është se këto pengesa në rrugë duhet të hiqen nga vetë njerëzit që i kanë vënë ato”, ka thënë ajo.

　

Lëvizja e lirë në veri të Kosovës edhe për misionin e Bashkimit Evropian është e reduktuar që nga 25 korriku i vitit të kaluar kur autoritet e Kosovës vendosën të marrin nën kontroll dy pikat kufitare atje.　/ albinfo& rtk/

  

---