Prezantohet në Shkup, projekti “Javët e Biznesit Kombëtar”

Aktiviteti ka për qëllim rritjen, konsumimin dhe bashkimin e prodhuesve shqiptare në pesë shtetet ku jetojnë shqiptarët

Projekti “Javët e Biznesit Kombëtar”, është prezantuar në Shkup, nga Aleanca e Bizneseve të Kosovës. Aty kanë marrë pjesë zyrtarë komunash nga viset shqiptare ku po realizohet aktiviteti, i cili ka për qëllim vetëdijesimin më të madh tek qytetarët se prodhimet shqiptare janë cilësore dhe se konsumimi i tyre është në të mirën e të gjithëve.

Kryetari i Aleancës Kosovare të Bizneseve, Agim Shahini, ka theksuar se projekti “Javët e Biznesit Kombëtar”, është një ngjarje kapitale për shqiptarët, i cili organizohet në kuadër të 100 vjetorit të Pavarësisë së Shqipërisë.

Sipas tij, aktiviteti ka për qëllim rritjen, konsumimin dhe bashkimin e prodhuesve shqiptare në pesë shtetet ku jetojnë shqiptarët.

Projekti dikur ,”Javët e Biznesit të Kosovës”, sipas tij, tashmë është shndërruar në “Javët e Biznesit Kombëtar” dhe ka gjetur mbështetje nga dy qeveritë dhe komunat e të gjitha trevave shqiptare ku edhe po mbahen aktivitetet, njofton AKB.

Shahini ka thënë se projekti ka zgjuar jehon të madhe dhe mesazhi i këtij projekti është mirëpritur e përkrahur fuqishëm nga të gjithë.

“Deri më tash nuk ka pasur ndonjë projekt të tillë kombëtar në asnjë vend të Ballkanit dhe ky është i pari që gjen zbatim”, ka theksuar ai.

Ndërsa, Menderes Kuçi, kryetar i Odës Ekonomike të Maqedonisë Veri Perëndimore, ka thënë se është privilegj i veçantë, por në të njëjtën kohë edhe përgjegjësi për të qenë pjesë e këtij përvjetori jubilar, sepse duhet në mënyrën më të mirë të lëmë gjurmët tonë në histori dhe të bëjmë atë që gjeneratat para nesh nuk arritën ta bënin, të vëmë gurë themelet e pavarësisë ekonomike.

“Kudo që kemi shkuar politikanët kanë kërkuar që të rrisim qarkullimet tregtare ndër shqiptare, ndërsa ne kërkojmë nga ata kushte më të favorshme për 100 investime të reja”, ka thënë Kuçi.

“Javët e Biznesit Kombëtar”, do të karakterizohen me një mori aktivitetesh ekonomike dhe kulturore me shtrirje në pesë shtete.