Prej sot jashtë përdorimit edhe pasaportat e vjetra shqiptare

Të gjithë qytetarët e Shqipërisë prej sot mund të udhëtojnë jashtë vendit vetëm me pasaporta biometrike

Pasaportat e vjetra edhe pse kanë afat nuk do t’u shërbejnë më për të kaluar nëpër pika kufitare, e për udhëtime jashtë vendit.

Në bazë të vendimit të Qeverisë së Shqipërisë, pasaportat jobiometrike kanë qenë të vlefshme si dokument udhëtimi deri më datën 1 mars 2012.

Zëvendës ministri i brendshëm, Ferdinat Poni, ka sqaruar përmes një deklarate për media se shqiptarët mund të hyjnë në Shqipëri me pasaportat e vjetra, por ato nuk mund të përdorën për të dalë jashtë vendit, njofton mediet në Tiranë.

Sipas tij, 2 milionë e 217 mijë qytetarë kanë aplikuar për pasaportat biometrike.

Kështu, të gjithë shtetasit shqiptarë, që janë të pajisur me pasaporta jo biometrike, nuk mund t’i përdorin më ato, pavarësisht datës së skadimit që shënohet në dokument.