Fule: Kosova do ta ketë përkrahjen në procesin e integrimit evropian

Studimi i Fizibilitetit është një hap i rëndësishëm, që shënon avancimin e perspektivës evropiane për Kosovën

Komisioneri i BE-së për zgjerim, Stefan Fule gjatë një takimi me kryeministrin e Kosovës, Hashim Thaçi ka vlerësuar hapat e fundit të qeverisë kosovare në përshpejtimin e agjendës evropiane të integrimit.

Në këtë kuadër, kryeministri Thaçi, ka theksuar se Studimi i Fizibilitetit është një hap i rëndësishëm, që shënon avancimin e perspektivës evropiane për Republikën e Kosovës dhe është hapi i parë konkret, unik në mbështetje të shtetit të Kosovës, thuhet në njoftimin e Qeverisë.

“Qeveria e Republikës së Kosovës do të vazhdojë përkushtimin e saj në funksion të përmbushjes të të gjitha kritereve dhe standardeve evropiane të integrimit, në mënyrë që edhe procesi i liberalizimit të vizave për qytetarët e Kosovës të jetësohet sa më parë”, ka theksuar kryeministri Thaçi.

Komisioneri i BE-së për zgjerim, Stefan Fule e ka përgëzuar kryeministrin e Republikës së Kosovës, Hashim Thaçi për qasjen e tij të drejtë evropiane në raport me bashkëpunimin rajonal.

Fule ka theksuar se institucionet e Kosovës do ta kenë gjithë përkrahjen e duhur në porcesin e integrimit evropian të Kosovës.

Kryeministri Thaçi gjatë ditës në Bruksel është takuar edhe me kryeministrin e Republikës së Sllovenisë, Janez Jansha me kryeministrin e Republikës së Kroacisë, Zoran Milanoviq, si dhe me eurodeputetët Eduard Kukan dhe Ulrike Lunacek.

Në këto takime është përgëzuar qëndrimi i Prishtinës për hapjen e perspektivës evropiane për Kosovën dhe rajonin si dhe i është dhënë mbështetje Qeverisë së Republikës së Kosovës në procesin e përmbushjes së agjendës evropiane për Kosovën.