Clinton përgëzon Serbinë për marrjen e statusit të kandidatit në BE

Clinton përshëndeti njëkohësisht njoftimin e BE-së për të filluar shqyrtimin e mundësisë për një marrëveshje stabilizim-asociimi për Kosovën

Sekretarja amerikane e Shtetit, Hillary Clinton, ka përshëndetur vendimin e Këshillit Evropian për t’i dhënë Serbisë statusin e kandidatit për anëtarësim në Bashkimin Evropian.

Sekretarja Clinton uroi udhëheqjen dhe popullin e Serbisë për punën e bërë, angazhimin dhe vendosmërinë drejt këtij synimi.

Clinton përshëndeti njëkohësisht njoftimin e Bashkimit Evropian për të filluar shqyrtimin e mundësisë për një marrëveshje stabilizim-asociimi për Kosovën, gjë që siç tha ajo, është e rëndësishme për orientimin evropian të Kosovës, dhe një sinjal i rëndësishëm për angazhimin e Bashkimit Evropian ndaj Kosovës.

“Integrimi evropian është në të mirë të Serbisë, Kosovës dhe gjithë rajonit. Unë i përshëndes udhëheqësit e Kosovës dhe Serbisë për kurajon dhe angazhimin e tyre në marrjen vendimeve të vështira politike të nevojshme për të realizuar këto objektiva”, tha Clinton, raporton VOA.

Sekretarja amerikane e Shtetit u bëri thirrje udhëheqësve të dyja vendeve, të Kosovës dhe Serbisë, që të vazhdojnë përparimin në dialogun e udhëhequr nga Bashkimi Evropian. Ajo shprehu angazhimin e Shteteve të Bashkuara për të bashkëpunuar ngushtë me dy vendet në mbështetje të një të ardhmeje paqësore dhe të begatë evropian. /albinfo.ch & Voa/