Presidenca: Zgjedhjet serbe në Kosovë janë ilegale

Kryetari serb, Tadiq, kishte deklaruar se organizimi i zgjedhjeve lokale serbe në Kosovë do të varet nga rrethanat e sigurisë

Presidenca e Kosovës ka reaguar lidhur me deklaratat e zyrtarëve të lartë të Serbisë, që prekin çështjen e organizimit të zgjedhjeve lokale serbe edhe në Kosovë.

Kryetari i　 Serbisë, Boris Tadiq, kishte deklaruar se organizimi i zgjedhjeve lokale serbe në Kosovë do të varet nga rrethanat dhe faktorët e sigurisë, por shteti serb do të përpiqet që të bëjë gjithçka që është e mundur që t’i realizojë principet kushtetuese të tij.

Por, Arbër Vllahiu, këshilltar për media i presidentes së Kosovës Ahtifete Jahjaga, ka thënë se zgjedhjet e paralajmëruara të Republikës së Serbisë në territorin e Republikës së Kosovës janë ilegale, kundër kushtetuese dhe nuk prodhojnë asnjë efekt ligjor.

Vllahiu ka theksuar se tentimi për të mbajtur zgjedhje lokale në territorin e Kosovës nga ana e Serbisë është në kundërshtim me të gjitha dokumentet dhe rezolutat ndërkombëtare.

Sidoqoftë, çështja e mbajtjes ose jo të zgjedhjeve lokale serbe në territorin e Kosovës tash e sa ditë ka qenë temë e debateve dhe polemikave edhe në Serbi.

Përfaqësuesit e opozitës në Serbi, i kanë akuzuar autoritetet e Beogradit duke thënë se anashkalimi eventual i Kosovë sa u përket zgjedhjeve lokale, do të nënkuptonte tradhti dhe pranim të shtetit të pavarur të Kosovës nga shteti serb./rel&albinfo/