Rezervat e naftës mbesin pasuri e Shqipërisë

Shqipëria ka rreth 180 milionë ton naftë në burime e saj nëntokësore, por nxjerrja dhe përpunimi i kësaj lënde të çmuar kërkon shumë investim dhe teknologji.

Aktualisht, Shqipëria ka 30 milionë ton rezerva nafte të nxjerra, ndërsa  janë harxhuar deri më tash 50 milionë.

Të dhënat u bënë të ditura nga zëvendësministri i Ekonomisë, Eno Bozdo, gjatë diskutimeve në komisionin parlamentar të Ekonomisë të dy projektligjeve për hidrokarburet, atë për heqjen e Albpetrolit nga trajtimi preferencial fiskal si dhe marrëdhëniet hidrokarbure të kësaj kompanie me palët e treta pas privatizimit.

“Projektligji privatizon një kompani që sot është shtetërore dhe nesër, pas procesit të privatizimit, do të operojë si të gjitha kompanitë e tjera private në këtë sektor. Rezervat e naftës mbesin pasuri të këtij vendi, puset dhe nafta nuk privatizohen dhe askush nuk e ka thënë. Nuk duhet spekuluar me këtë koncept”, ka deklaruar Bozdo. /start&albinfo/