Xherdan Shaqiri këndon rep

Ajo që shihet dhe dëgjohet është dëshmi për talentin e fshehur muzikor të Shaqirit

Se Xherdan Shaqiri është magjistar i futbollit, nuk dyshon më askush. Por kush do të mendonte se ai ka talent edhe për muzikë? Ai e ka dëshmuar këtë prirje të panjohur deri më tash në solemnitetin e hapjes së shitores së veshjeve sportive “Nike” në Cyrih, ku xhuxhi magjik ishte mysafir nderi.

Me këtë rast ai, pa ngurruar fare kishte hipur në skenë duke lavdëruar trikon dhe atletet e sponsorit të tij. Por, nuk përfundon me kaq: moderatori dhe reperi Knackeboul e kthen Shaqirin sërish në skenë.

Së pari reperi në fjalë improvizon një tekst dhe pas tij edhe Xherdani. Ai merr mikrofonin, e shtrëngon fort mbi buzë dhe jep taktin. Ajo që shihet dhe dëgjohet është dëshmi për talentin e fshehur muzikor të Shaqirit.

Në hapjen e lokalit kanë marrë pjesë edhe Yan Sommer, Granit Xhaka, Adrian Nikçi dhe Alain Sutter.

Gjatë javës së parë të hapjes së shitores Nike (5-11 mars) e gjithë fasada e qendrës tregtare “Jelmoli” do të jetë e mbuluar nga portretet gjigante të sportistëve si: Roger Federer, Xherdan Shaqiri, Sara Meier etj. Këta janë duke i bërë reklamë fushatës “makeitcount” të NIke-s që sensibilizon popullatën për tu marrë sa më shumë me sport.