Është hapur në Tiranë panairi “Javët e biznesit kombëtar”

Sllogani "Unë konsumoj prodhime vendore, po Ju?", prek ndërgjegjet tona, ato institucionale të pesë shteteve"

“Javët e Biznesit Kombëtar” kanë filluar me prezantimin e prodhimeve kombëtare në panairin e organizuar në Tiranë, në Ditën e Verës.

Hapjen solemne të këtij Panairi e bëri kryetari i Bashkisë së Tiranës, Lulzim Basha.

Ai　 shfaqi kënaqësinë që në Ditën e Verës, këtë festë të lashtë që festohet në mbarë Shqipërinë, kishin ardhur në Tiranë nga të gjitha trevat shqiptare, nga Maqedonia, Kosova, Presheva e Mali i Zi, raportojnë mediat shqiptare.

“Jam i lumtur që Tirana pret 100 biznese shqiptare, kombëtare nga të gjitha trevat, të cilët do të ekspozojnë prodhimet e tyre përpara miliona shqiptarëve. Prodhimet e tyre na bëjnë krenarë me cilësinë e lartë, me shijen e tyre të rrallë”, ka theksuar Basha.

Ndërkohë kryetari i Aleancës Kosovare të Biznesit, Agim Shahini, ka thënë se në këtë aktivitet janë mbi 100 biznese me më shumë se 10 mijë prodhime shqiptare, e cila është ofertë shumë e mirë që u ofrohet të gjithë konsumatorëve shqiptarë.

Sipas tij, sllogani “Unë konsumoj prodhime vendore, po Ju?”, prek ndërgjegjet tona, ato institucionale të pesë shtete.

“Ky slogan u ofron edhe investitorëve më shumë interesim, sepse projekti ka të bëjë me ofertën mbi 10 milionë konsumatorë shqiptarë. Investitorët e huaj do të interesohen më shumë tani për të ardhur në trevat kombëtare shqiptare”, ka deklaruar ai.　

Fjalime përshëndetëse patën edhe kryetari i Preshevës,　Ragmi Mustafa, i Çairit, Izet Mexhiti, kryetari i KASH, Enver Ferizi si dhe ministri i Bujqësisë, Genc Ruli.