Serbia që 12 vjet mban thesarin e trashëgimisë kulturore të Kosovës

Ministria e Kulturës dhe Këshilli i Kosovës për Trashëgimi Kulturore nuk kanë qasje të njëjtë për mënyrën e kthimit e artefakteve arkeologjike dhe etnologjike, të cilat Serbia ia mori Muzeut të Kosovës qysh në vitin 1999.

Drejtoresha ekzekutive e KKTK-së, Xhejlane Hoxha, ka bindjen se me bisedime artefaktet nuk kthehen.

Sipas saj, Kosova duhet të ngrejë padi ndaj atyre që u zotuan se do të kthejnë artefaktet. E zyrtarë të MKRS-së thonë se bisedimet janë hapi i parë dhe se besojnë se do të japë rezultat. Në të kundërtën ata thonë se do të mund të shfrytëzojnë të drejtën e padisë ndaj Serbisë.

Për kthimin e më se një mijë e 500 artefakteve, ata thonë se kanë një strategji. Por e mbajnë sekret. Hoxha thotë se ajo strategji do të duhej të jetë e hapur për publikun. Ajo ka edhe një tjetër vërejtje serioze për MKRS-në, kur bëhet fjalë për artefaktet, shkruajnë mediat në Prishtinë.

Ajo thotë se është e pafalshme që Ministria nuk e ka futur në listë të trashëgimisë kulturore për mbrojtje të përkohshme edhe thesarin arkeologjik dhe etnologjik të Kosovës.

Përgjigja e Ministrisë për këtë është se Muzeu posedon dokumentacionin për këtë thesar.