Dhjetëra kallëzime penale për incidentet në Maqedoni

Ministria e Punëve të Brendshme e Maqedonisë, ka ngritur 77 kallëzime penale ndaj individëve dhe grupeve të individëve si kryerës të incidenteve të fundit ndëretnike në Maqedoni.

Ministrja e MPB-së, Gordana Jankullovska ka deklaruar se patjetër do të sanksionohen të gjithë personat që kanë kryer incidente apo janë përfshirë në to gjatë periudhës së fundit dhe se institucionet nuk do të tolerojnë dhunuesit, transmeton INA.

“Ne kemi vërtetuar porosinë tonë përmes 77 kallëzimeve penale të ngritura për incidenteve, duke bërë të qartë se dhuna dhe gjuha e urrejtjes nuk duhet të tolerohen”, ka thënë Jankullovska.

Ajo ka shprehur kritika ndaj Gjykatës së Tetovës për lirimin e dy tifozëve të “Ballistave” të klubit të futbollit “Shkëndija”.

“Vendimi i kësaj gjykate është imitues për shkak se ata kishin sulmuar një pjesëtar policie i cili ishte angazhuar për parandalimin e dhunës”, ka theksuar ministrja e MPB-së.