KFOR-i heton rrethanat e arrestimit të policëve kosovarë

Edhe EULEX-i, ka bërë të ditur se po i hulumton rrethanat dhe lokacionin ku ka ndhodhur ngjarja

Një komision ushtarak i KFOR-it ka dalë në vendin e ngjarjes për të vërtetuar dhe hetuar rastin e arrestimit të policëve kosovarë, Shukri Binaku dhe Sami Beqiri nga policia serbe në pikën kufitare të Merdares.

Zëdhënësi i Policisë së Kosovës, Baki Kelani, u ka thëmë nediave kosovare se policët e kidnapuar nga xhandarmëria serbe kanë qenë duke patrulluar brenda territorit të Kosovës. Sipas tij, kjo ka dal edhe nga hetimet e zhvilluara nga policia e EULEX-it dhe KFOR-it.

Kurse, Ministri i Punëve të Brendshme, Bajram Rexhepi, ka thënë se është në kontakt me autoritetet ndërkombëtare, sidomos me EULEX-in, për të ushtruar ndikimin që policët, ndaj të cilëve është shpallur ndalesa prej 48 orësh në burgun e Kurshumlisë, të lirohen dhe të kthehen në shtëpi, raporton RTK.

Edhe EULEX-i, ka bërë të ditur se po i hulumton rrethanat dhe lokacionin ku ka ndhodhur ngjarja.　

EULEX-i ka shprehur habinë me këtë veprim pas frymës pozitive dhe arritjes së marrëveshjes për menaxhim të integruar të kufirit gjatë dialogut Kosovë – Serbi.

Policia e Serbisë të shtunën, ka arrestuar në rajonin e Merdarës dy policë të Kosovës.

Pas arrestimit kanë reaguar Presidenca, Qeveria dhe Kuvendi i Kosovës, dhe partitë politike, të cilët kanë dënuar këtë akt dhe kanë kërkuar lirimin e menjëhershëm të policëve kosovarë.

Po ashtu ka reaguar edhe Qeveria e Shqipërisë, si dhe politikanë shqiptarë nga Maqedonia.