Hapësira të pashfrytëzuara për bashkëpunimin Kosovë-Mal i Zi

Kosova, Mali i Zi dhe shtetet e tjera në rajon, mund ta rrisin interesimin e investitorëve të huaj vetëm me bashkëpunim

Kosova dhe Mali i Zi duhet të bashkëpunojnë për të ngritur shkëmbimet tregtare, për tu bërë atraktiv për investitorët e jashtëm. Këto komente u bënë të martën në Forumin Ekonomik Kosovë – Mali i Zi, i cili u organizua nga Odat Ekonomike të te dyja vendeve, si dhe në përkrahje të Agjencisë për Promovimin e Investimeve të Kosovës, thuhet në një komunikatë për shtyp të lëshuar nga OEK.

Kosova, Mali i Zi dhe shtetet e tjera në rajon, mund ta rrisin interesimin e investitorëve të huaj vetëm me bashkëpunim, tha në forum zëvendëskryeministrja znj. Mimoza Kusari- Lila. “E rëndësishme është se kur të krijohen kushtet e barabarta midis shteteve fqinje atëherë mund të konkurrojmë bashkë më lehtë tek investitorët e huaj, jo si shtete të vogla, por si bashkësi e shteteve me potencial të madh”, theksoi Kusari-Lila.

Kryetari i Odës Ekonomike të Kosovës (OEK), z. Safet Gërxhaliu tha se bashkëpunimi ekonomik në mes të Kosovës dhe Malit të Zi duhet të jetë prioritet. “Vërtet në Kosovë, Mal të Zi dhe në përgjithësi në Ballkan bisedohet për integrimin politik, por anashkalohet integrimi ekonomik dhe besoj që nuk mund të ketë integrim politik pa përshpejtim të proceseve ekonomike dhe çelësi i suksesit është bashkëpunimi ekonomik”, theksoi Gërxhaliu.

Ndërkaq, kryetari i Odës Ekonomike të Malit të Zi, Velimir Mijushkoviq, kërkoi intervenimin e politikës për evitimin e barrierave të cilat po e vështirësojnë punën e biznesit. “Një ndër barrierat janë sigurimet kufitare, pagesa e taksave gjatë transportit të mallrave në të dy anët. Jam i sigurt se në kuadër të bisedave mes dy kryeministrave që do të mbahen, edhe këto probleme do të shqyrtohen dhe do të zgjidhen”, u shpreh Mijushoviq.

Ai kërkoi që turistët nga Kosova përveç Ulqinit, të vizitojnë edhe vendverimet e tjera malazeze. Por, në këtë aspekt ai i  kritikoi drejtorët e rivierave të tjera, të cilët me gjithë që ishin ftuar, nuk kanë ardhur në Prishtinë për tu promovuar, përfundon komunikata..